「雞蛋六隻，糖呢就兩茶匙，仲有D橙皮添...」
客廳裡的高清電視開著沒人欣賞，廚房裡卻站著一大一小的男子指指劃劃忙個不停。
大：阿軍，用紙筆drop低喇~
瀨尿蝦 300 克
紅辣椒 1-2 隻 （切粒）
蒜茸馬拉盞 2 湯匙
新鮮蒜茸 2 湯匙
薑 2 片 （切條）
椒鹽適量
鹽少許
…… 我地首先要將D瀨尿蝦洗乾淨，用DD鹽醃佢一陣...然後將D瀨尿蝦泡一泡油，撈返上黎就擺埋一邊先... 跟住我地用一羹油燒紅個鑊，爆香D薑、蒜茸、蒜茸馬拉盞同紅辣椒... 倒埋D瀨尿蝦落鑊，兜下佢... 加半飯碗水，衿蓋焗佢幾分鐘... 最後我地將適量既椒鹽曬落去，兜勻上碟，搞掂！
大哥邊拋鑊邊解釋椒鹽瀨尿蝦材料的份量及步驟。鄧勵軍則留心聽教，並抄下筆記，就像一個乖乖小男生在為自己前途而努力學習一樣。這時，大哥炒好的椒鹽瀨尿蝦溢出香味，從底層慢慢地飄至二樓，把TINA引了下來。
TINA：嘩好香啊~ 今年父親節真係有食神喇有哥哥親自下廚~（這才看到鄧勵軍，感到疑惑） 咦？鄧勵軍？你做咩會係度架？
大：因為阿賞今個禮拜要同佢老豆慶祝父親節，教唔到阿軍煮，我咪代一堂囉~
TINA：又會要你教既...
大哥失笑，回想起星期六在自己的office，又一次被殷賞的師兄魔咒擊倒......
大：阿賞？做咩咁錯盪走上黎呀？
賞：師兄 （一臉無辜） ...
大：做咩咁既樣啊...
賞：…… 我有D野想你幫幫手...
大：妳咪講囉。
賞：你聽日可唔可以幫我教鄧勵軍煮野食啊？
大：教佢煮野？你幾時開始開班授徒架？你聽日唔得閒咩？
賞：聽日係父親節呀嘛！我要同老豆食飯呀...
大：咁我都要同阿爸食飯架...
賞：師兄呀... 師兄...
大哥最後抵受不住殷賞的師兄魔咒，萬般無奈的應允了。
呵呵呵~
一道笑聲由遠至近進入廚房範圍。
這房子裡除了有大哥、TINA、阿軍外，不是他會是誰呢？
器：張按摩椅真係舒服啊~
大：老豆你頭先唔係係房咩？
器：係啊。
大：你成張按摩椅搬左上房啊？
器：梗係唔係喇！傻仔... 哈哈~
大：咁點解會有張按摩椅係書房架？
器：呵呵！好簡單者~ 因為TINA送左張按摩椅比我咯！呵呵~
TINA：係呀！我見爸爸成日行落大廳去用張按摩椅，咪趁住父親節送多張按摩椅比爸爸，等爸爸係廳睇電視果時用又得，臨訓前係房用都得囉~
這刻的鄧勵軍卻活像一個花痴般，深情瞇眼地看著TINA的一眸一笑，對她的一言一語都細心咀嚼，心裡不斷為看到女神而興奮起來。不過另一方面他卻想著， 我會唔會阻住大哥佢地過節呢...？
軍：大哥呀... 我都係... 走先啦...
大：你唔係諗住一個人返屋企又食罐頭啊？
鄧勵軍這才記起，今天包公跟老總一起和GEORGE慶祝，GARY回去陪媽媽吃飯了，全年無休的MARCO繼續見客，而剩下來的自己...
根本不清楚自己的家在哪，不知道怎樣找得著爸爸媽媽....
閆器看著這個平日活潑喜歡跟金句做人的小朋友，眼神竟流露出一絲迷惘，於是便帶點誇張的說：不如你留低一齊食飯喇，人多熱鬧D啊嘛~
大：係囉今晚係度食喇~
軍：咁樣... 唔係幾好意思既... 話哂父親節應該同屋企人一齊過...
TINA：爸爸叫你留低食飯，一於就咁話。
TINA一句勝過任何人說到口倦舌燥。就像中了降頭一樣，鄧勵軍不再猶疑，笑得又曖昧又馴如小綿羊。
軍：哦好喇咁~ 打搞哂~
大：咁就要加料啦！阿軍，過黎幫幫我手。
軍：好呀大哥~
-----
晚上七時‧閆家
軍、器／大／TINA：大家食飯／阿爸食飯／爸爸食飯~
開動後大哥就先夾了一隻蝦給鄧勵軍，使孩子不禁受寵若驚。
大：記住呢個味道喇！你返去試整既時候就知道自己整成點~
鄧勵軍毫不客氣一口咬下那隻椒鹽瀨尿蝦，他呆了... 神奇！怎麼可能？！蝦身剛好七成熟，不多不少，不油不膩，調較得剛好的鹹辣絕配組合更是令人食指大動。外脆內軟，咬下去竟可以「索索」聲，比昨天包公請我們去大富貴酒樓吃的那碟五香麻雀還要香還要脆啊！
軍：大哥...（興奮得手舞足蹈）... 好好味呀！！（低頭又繼續享受）
大： 哈哈~ 為食到你呀！第日你都可以自己整喇。
整頓晚飯都在和諧融洽的氣氛下進行。
大哥跟TINA都很體貼孝順地替閆器夾菜添酒，逗得閆器見牙唔見眼。這幅家庭樂看得鄧勵軍睇到一臉羡慕。
如果知道自己的爸媽，我必定也會好好侍候他倆…
軍：（拿起桌上唯一的汽水舉杯）真係多謝閆生你今晚留我係度食飯，祝你父親節快樂！
大/Tina：阿爸／爸爸，父親節快樂！
閆器樂得又「呵呵」了幾下，高興的說：乖喇乖喇！我都祝你快高長大！飲杯！
-----
回到蛤蚧總部，屋內冷清黑暗的空氣跟閆家燈火通明的暖意形成了強烈對比。
站於窗前，鄧勵軍望向那像被吃了一大口的月亮，心頭泛起一陣微微酸楚。
進「潮」以後的日子忙碌而充實，尋找生父生母的念頭早已被自己擱置。
你們...... 還好嗎?
不知道你們會否聽到兒子的說話，但是此刻的我實在不吐不快...
我太想找到你們，曾經。
隨著年歲，希望逐漸變得渺茫；經歷，亦教會我要放開執著。
父母與兒女之間，還是需要緣和份。
雖然不曾見過你們。雖然不明白你們為什麼要把我一個留下來。
但仍然感謝，感謝你們把我帶到這個世上；
感謝你們給我有這麼一個機會，去認識去感受這個世界；
感謝你們讓我在人生旅途上，遇上了情同家人的兄弟伙伴，還有以字句醫我心的助養人。
現在的鄧勵軍，生活過得很好很快樂。
當然，我依然期待某一天，可以跟你倆會面，一起喝啖茶食個包...
對了。爸爸，父親節快樂。
無論你在哪。
無論你是誰。
包公：細路~ 我地返黎喇~ 咦？咁黑既？
順手開了燈，三隻蛤蚧眼見露台有一個孤獨、矮小、頭髮蠟起了的背影。有默契的向露台走去：包國仁從後玩弄軍的眼鏡；Gary輕輕的拍拍他的頭顱；而Marco則脫下自己的西裝外套往瘦弱的身上披去。
軍：（驚訝）嘩你地幾時係度架？
Marco：岩岩入門口咋嘛~ 返到樓下就見到佢地兩個係度等lift。
包公：阿軍，做咩企係露台發呆呀？
軍：冇... 冇呀...... 諗緊下期書做D咩好咋嘛。
Gary：哦~ 係啊帶左宵夜返黎比你食添~ 咪話唔夠兄弟啦！
包公：我都買左喎！（提起膠袋）炸生蠔~
Gary：（陽光的笑）我有我阿媽整既避風堂炒蟹~
Marco：（鬼馬的拿出）我都買左魷魚絲番黎啊~
軍：（兩眼發亮中）喂我都係閆家打包既椒鹽瀨尿蝦返黎喎~！
包公、Marco、Gary：係閆家？？！！
Marco：你點解會係閆家架？
包公：你點解會係閆家打包野食番黎？？
Gary：仲竟然可以打包椒鹽瀨尿蝦？以大閆生咁既性格，你都可以係佢屋企打包到食物？！鄧勵軍，你用左咩方法呀？？
軍：其實... 我無用咩方法。係閆家打包野食番黎同點解係閆家，你地都無需要知道..........（托一托眼鏡，故作神秘）
包公：講呀！信唔信我地食哂d野唔比你食呀啦？！
一聽到包公的恐嚇性言論，這小子立刻變得不再神秘。
軍：包公，我知你好好人既~（裝討好的笑臉）
包公：（打眼色）Marco、Gary！
Marco、Gary：收到！（即刻打開食物盒，徒手起食物，作勢放進口中）
軍：（急忙）其實係咁既！
包公、Marco、Gary見奸計得逞，臉上露出一個勝利的笑容。
鄧勵軍說起他在閆家發生的事情......
Gary：（恍然大悟）咁即係大閆生本來想勒住你，唔比你打包番黎。點知大哥就出聲叫你帶走椒鹽瀨尿蝦啦？
軍：簡單黎講就係咁啦~（再托一托眼鏡）
包公：咁你做咩用十分鐘黎講一段本來可以用一句交待哂既說話？
Gary跟Marco對鄧勵軍施展仇視目光大法。即使鄧勵軍立刻道歉，但是Gary跟Marco還是沒有打算停止「怒啤」。此時，一段短訊鈴聲傳進四隻蛤蚧的耳中。
軍：（抽出手機一看）你地去廚房準備一下宵夜先呀！我覆埋個sms就過黎~
包公：古古怪怪咁！邊個既sms呀？
Marco：咪係！做乜咁緊張先？女朋友呀？
軍：咪亂講呀你地！
包公跟Marco企圖搶過手機，鄧勵軍憑著精小敏捷的身軀左閃右避過他們的攻擊。兩個大男人東追西跑被這小子弄氣喘。這場鬧劇還是由Gary的話結束。
Gary：唔好玩啦~ 幫手開飯喇！
隨著這句話，玩著追逐遊戲的三個孩子也停下腳步來。
包公：覆完你個女朋友好快d過黎啦！
軍：癡線喇…
看著三隻蛤蚧走進廚房，鄧勵軍才敢把手機拿出來。
「鄧勵軍！！今晚我開左webcam同係南非既daddy傾計啊超miss佢~ 佢同班朋友開party啊~ 仲成碟鮑魚同龍蝦拎過黎引誘我囉...」
細味著短訊，心裡也替這個朋友高興。他飛快地敲著手機鍵盤。
「哈哈~ 我今日跟大哥學左整椒鹽瀨尿蝦啊！遲D搵日整過你食喇陳寶拉：P」
軍大口深呼吸，把之前感性的情緒全都釋放。
再次望向月光，仍是缺了一口，自己心裡卻被填得滿滿的。
露齒一笑，鄧勵軍跑向三位兄弟：海鮮大餐我黎喇！！！
—完—
